mercredi 11 avril 2012

Ballade des Dames du Temps Jadis François Villon ( Poète France )

Ballade des Dames du Temps Jadis


                                                       Dictes moy ou, n'en quel pays
                                                       Est Flora la belle Rommaine,
                                                       Archipiades, ne Thaïs,
                                                       Qui fut sa cousine germaine,
                                                       Echo parlant quant bruyt on maine
                                                       Dessus rivière ou sus estan,
                                                       Qui beaulté ot trop plus qu'humaine,
                                                       Mais ou sont les neiges d'antan ?

                                                       Ou est la tres sage Helloïs,
                                                       Pour qui chastré fut et puis moyne
                                                       Pierre Esbaillart a Saint Denis ?
                                                       Pour son amour ot ceste essoyne.
                                                       Semblablement, ou est la royne
                                                       Qui commanda que Buridan

                                                       Fust geté en ung sac en Saine ?
                                                       Mais ou sont les neiges d'antan ?

                                                       La royne Blanche comme lis
                                                       Qui chantoit a voix de seraine,
                                                       Berte au grant pié, Bietris, Alis,
                                                       Haremburgis qui tint le Maine,
                                                       Et Jehanne la bonne Lorraine
                                                       Qu'Englois brulerent a Rouan ;
                                                       Ou sont ilz, ou, Vierge souvraine ?
                                                       Mais ou sont les neiges d'antan ?
                  
                                                      Prince , n'enquerez de sepmaine
                                                      Ou elles sont, ne de cest an,
                                                      Qu'a ce reffrain ne vous remaine :
                                                      Mais ou sont les neiges d'antan ?


                                                                                                      François Villon

























Aucun commentaire:

Enregistrer un commentaire