mardi 1 octobre 2013

Le Lais François Villon ( poème France )

                                                                                                                                                                                                                                                                                                                                                                                                                                                                                         
                                                                                                                                                                                        
                                                                                                         
                                                
                                                                        
                                    Le Lais
                                                ( 1457  édité en  1489 25 ans après sa disparition )
                                        
                                    I

            L'an quatre cens cinquante six,
            Je, François Villon, escollier,
            Considérant, de sens rassis,
            Le frain aux dents, franc au collier,
            Qu'on doit ses oeuvres conseiller,
            Comme Vegece le raconte,
            Sage Rommain, grant conseiller
            Ou autrement on se méconte...

                                   II

           En ce temps que j'ay dit devant,
           Sur le Noël, morte saison,
           Que les loups se vivent de vent
           Et qu'on se tient en sa maison                                                  
           Pour le frimas, près du tison,
           Me vint ung vouloir de brisier
           La très amoureuse prison                                                      
           Qui vouloit mon cuer debrisier.
                                                                                                                   lestrepublicain.fr
                                 III

           Je le feis en telle façon,
           Voyant celle devant mes yeulx
           Consentant à ma desfaçon,
           Sans ce que ja luy en fust mieulx ;
           Dont je me dueil et plains aux cieulx,
           En requerant d'elle vanjance
           A tous les dieux venerieux,
           Et du grief d'amour alléjance.

                                IV
           Et se j'ay prins en ma faveur
           Ces doulx regars et beaux semblans
           De tres decevante saveur
           Me trespersans jusques aux flans,
           Bien ilz ont vers moy les piez blans
           Et me faillent au grant besoing.
           Planter me fault autres complans
           Et frapper en ung autre coing.

                               V
                    
           Le regart de celle m'a prins
           Qui m'a esté felonne et dure :
           Sans ce qu'en riens aye mesprins,
           Veult et ordonne que j'endure                                                      
           La mort, et que plus je ne dure ;
           Si n'y voy secours que fouïr.
           Rompre veult la vive souldure,                                                         
           Sans mes piteux regrets oïr !

                               VI
           Pour obvier a ces dangiers
           Mon mieux est, ce croy, de partir
           Adieu ! Je m'en vois à Angiers,
           Puisqu'el ne me veult impartir
           Sa grace, ne la me departir,
           Par elle meurs, les membres sains ;
           Au fort, je suis amant martir
           Du nombre des amoureux sains.

                               VII
                                                                                                                              henrigaugaud.fr
           Combien que le départ me soit
           Dur, si faut-il que je l'eslongne :
           Comme mon povre sens conçoit,
           Autre que moy est en quelcongne,
           Dont oncques soret de Boulongne
           Ne fut plus alteré d'umeur.
           C'est pour moy piteuse besongne :
           Dieu en vueille oïr ma clameur !

                                VIII

            Et puis que departir me fault,
            Et du retour ne suis certain
            ( Je ne suis homme sans défault
            Ne qu'autre d'acier ne d'estain,
            Vivre aux humains est incertain
            Et après mort n'y a relaiz,
            Je m'en vois en pays loingtain ),
            Si establis ce present laiz.

                                 IX

            Premierement, ou nom du Pere,
            Du Filz et du Saint Esperit,
            Et de sa glorieuse Mere
            Par qui grace riens ne perit,
            Je laisse, de par Dieu, mon bruit
            A maistre Guillaume Villon,
            Qui en l'honneur de son nom bruit,
            Mes tentes et mon pavillon
                                                                                                              
                                  X

            Item, a celle que j'ai dit,
            Qui si durement m'a chassié
            Que je suis de joye interdit
            Et de tout plaisir dechassié,
            Je laisse mon cuer enchassié
            Palle, piteux, mort et transy :
            Elle m'a ce mal pourchassié,
            Mais Dieu luy en face mercy !
                                   XI                               

             Item, a maistre Ythier Marchant,
             Auquel je me sens tres tenu,
             Laisse monBranc d'acier tranchant,
             Ou a maistre Jehan le Cornu,
             Qui est en gaige detenu
             Pour ung escot huit solz montant ;
             Si vueil, selon le contenu,
             Qu'on leur livre, en leur rachetant.

                                   XII
                                                                                                            
              Item, je laisse a Saint Amant
              Le Cheval Blanc avec la Mulle,
              Et a Blarru mon dyamant
              Et l'Asne Roye, qui reculle.
              Et le decret qui articulle
              Omnis utriusque sexus,
              Contre la Carmeliste bulle
              Laisse aux curez, pour mettre sus.
                                                                                  
                                               
                                  XIII

              Et a maistre Robert Valee,
              Povre clerjot en Parlement,
              Qui n'entent ne mont me vallee,
              J'ordonne principalement
              Qu'on luy baille legierement
              Mes brayes, estans aux Trumillieres,
              Pour coeffer plus honnestement
              S'amye Jehanne de Millieres.
                              
                                 XIV
              Pour ce qu'il est de lieu honneste,
              Fault qu'il soit mieulx recompensé,
              Car Saint Esoerit l'admoneste,
              Obstant ce qu'il est insensé ;
              Pour ce, je me suis pourpensé,
              Puis qu'il n'a de sens qu'une aulmoire,
              A recouvrer sur Maupensé,
              Qu'on lui baille l'Art de Mémoire.

                                   XV
                                                                                                                      
              Item, pour assigner la vie
              Du dessusdit maistre Robert,
              ( Pour Dieu, n'y ayez point d'envie ! )
              Mes parens, vendez mon haubert,
              Et que l'argent, ou la plus part,
              Soit emploié, dedans ces Pasques,
              A acheter a ce poupart
              Une fenestre emprès Saint Jaques.
                                               
                                XVI

               Item, laisse et donne en pur don
               Mes gans et ma hucque de soye
               A mon amy Jacques Cardon,
               Le glan aussi d'une saulsoye,
               Et tous les jours une grasse oye                                                      
               Et ung chappon de haulte gresse,
               Dix muys de vin blanc comme croye,
               Et deux procès, que trop n'engresse.

                                  XVII
                                                                                                        
               Item, je laisse a ce noble homme,
               Regnier de Montigny, trois chiens ;
               Aussi a Jehan Raguier la somme            
               De cent frans, prins sur tous mes biens.
               Mais quoy ? Je n'y comprens en riens                                            marmiton.org
               Ce que je pourray acquerir :
               On ne doit trop prendre des siens,
               Ne son amy trop surquerir.
                                                                                                                  
                                 XVIII

               Item, au seigneur de Grigny
               Laisse la garde de Nijon,
               Et six chiens plus qu'a Montigny,
               Vicestre, chastel et donjon :
               Et a ce malostru chanjon,
               Mouton, qui le tient en procès,
               Laisse trois coups d'ung escourjon,
               Et couchier, paix et aise, es ceps.
                                         
                                XIX

               Et a maistre Jaques Raguier
               Laisse l'Abruvouër Popin,
               Pesche, poires, sucre, figuier,
               Toujours le choix d'ung bon loppin,
               Le trou de la Pomme de Pin,
               Clos et couvert, au feu la plante,
               Emmailloté en jacoppin ;
               Et qui voudra planter, si plante.

                                 XX

               Item, a maistre Jehan Mautaint
               Et maistre Pierre Basanier,                                                      
               Le gré du seigneur qui attaint
               Troubles, forfaiz, sans espargnier ;
               Et a mon procureur Fournier,
               Bonnetz cours, chausses semelees,
               Taillees sur mon cordouannier,
               Pour porter durant ces gelees.
                                                                           
                                  XXI                       
             
               Item, a Jehan Trouvé, bouchier,
               Laisse le Mouton franc et tendre,
               Et ung tacon pour esmoucher
               Le beuf Couronné qu'on veult vendre,
               Et La Vache : qui pourra prendre
               Le vilain qui la trousse au col,
               S'il ne la rent, qu'on le puist pendre
               Et estrangler d'un bon licol !

                                  XXII

               Item, au Chevalier du Guet,
               Le Hëaulme luy establis ;
               Et aux pietons qui vont d'aguet
               Tastonnant par ces establis,
               Je leur laisse deux beaux riblis,
               La Lanterne a la Pierre au Let.
               Voire, mais j'auray les Troys Lis,
               S'ilz me mainent en Chastellet.

                                XXIII

               Item, a Perrenet Marchant,
               Qu'on dit le Bastart de la Barre,
               Pour ce qu'il est tres bon marchant,
               Luy laisse trois gluyons de fuerre
               Pµour estendre dessus la terre
               A faire l'amoureux mestier,
               Ou il luy fauldra sa vie querre,
               Car il ne scet autre mestier.

                                XXIV

               Item, au Loup et a Cholet
               Je laisse a la fois ung canart
               Prins sur les murs, comme on souloit,
               Envers les fossez, sur le tart,
               Et a chascun ung grant tabart
               De cordelier jusques aux piez,
               Busche, charbon et poix au lart,
               Et mes houseaulx sans avantpiez.
                                                                                                                                                 
                                XXV

               De rechief, je laisse, en pitié,
               A trois petis enfans tous nus
               Nommez en ce présent traictié,
               Povres orphelins impourveux,
               Tous deschaussiez, tous desvestus
               Et desnuez comme le ver ;
               J'ordonne qu'ilz soient pourveus,                                                         slava.kazykin.free.fr
               Au moins pour passer cest yver :
                                                                                                                
                               XXVI

               Premierement, Colin Laurens,
               Girart Gossouyn et Jehan Marceau,
               Despourveus de biens, de parens,
               Qui n'ont vaillant l'ance d'ung seau,
               Chascun de mes biens ung fesseau,
               Ou quatre blans, s'ilz l'ayment mieulx.
               Ilz mengeront maint bon morceau,
               Les enfans, quant je seray vieulx !

                                XXVII

               Item, ma nominacion,
               Que j'ay de l'Université,
               Laisse par resignacion
               Pour seclurre d'aversité
               Povres clers de ceste cité
               Soubz cest intendit contenus ;
               Charité m'y a incité,
               Et Nature, les voiant nus :

                              XXVIII

              C'est maistre Guillaume Cotin
              Et maistre Thibault de Vitry,
              Deux povres clers, parlans latin,
              Paisibles enfans, sans estry,
              Humbles, bien chantans au lectry ;
              Je leur laisse sans recevoir
              Sur la maison Guillot Gueuledry,
              En attendant de mieulx avoir.

                              XXIX

             Item, et j'adjoings a la crosse
             Celle de la rue Saint Anthoine,
             Ou un billart de quoy on crosse,
             Et tous les jours plain pot de Saine ;
             Aux pijons qui sont en l'essoine,
             Enserrez soubz trappe, volliere,
             Mon mirouër bel et ydoine
             Et la grace de la geolliere.

                             XXX

            Item, je laisse aux hospitaux
            Mes chassiz tissus d'arigniee,
            Et aux gisans soubz les estaux,
            Chascun sur l'oeil une grongniee,
            Trembler a chiere renfrongnee,
            Megres, velus et morfondus,
            Chausses courtes, robe rongniee,
            Gelez, murdris et enfondus.

                           XXXI
                                       
           Item, je laisse a mon barbier
           Les rongneuresde mes cheveulx,
           Plainement et sans destourbier,
           Au savetier mes souliers vieulx,
           Et au freppier mes habitz tieulx
           Que, quant du tout je les delaisse,
           Pour moins qu'ilz ne cousterent neufz
           Charitablement je leur laisse.
                                                                                                                                                     
                          XXXII
                                                            
           Item, je laisse aux Mendians,
           Aux Filles Dieu et aux Beguines,
           Savoureux morceaulx et frians,       
           Flaons,chappons et grasses gelines,
           Et puis preschier les Quinze Signes,
           Et abatre pain a deux mains.
           Carmes chevauchent nos voisines,
           Mais cela, ce n'est que du mains.

                            XXXIII

           Item, laisse le Mortier d'Or
           A Jehan, l'espicier, de la Garde,
           Une potence de Saint Mor,
           Pour faire ung broyer a moustarde.
           A celluy qui fist l'avant garde
           Pour faire sur moy griefz exploiz,
           De par moy saint Anthoine l'arde !
           Je ne luy feray autre laiz.

                            XXXIV

           Item, je laisse a Merebeuf
           Et a Nicolas de Louvieux,
           A chascun l'escaille d'ung oeuf,
           Plaine de frans et d'escus vieulx.
           Quant au concierge de Gouvieulx,
           Pierre de Rousseville, ordonne,
           Pour le donner entendre mieulx,
           Escus telz que le Prince donne.

                           XXXV

           Finablement, en escripvant,
           Ce soir, seulet, estant en bonne,
           Dictant ce laiz et descripvant,
           J'oïs la cloche de Serbonne,
           Qui tousjours a neuf heures sonne
           Le Salut que l'Ange predit ;
           Si suspendis et y mis bonne
           Pour prier comme le cier dit.

                        XXXVI

           Ce faisant, je m'entroublié,
           Non pas par force de vin boire,
           Mon esperit comme lié ;
           Lors je sentis dame Memoire
           Reprendre et mettre en son aumoire
           Ses especes collatéralles,
           Oppinative faulce et voire,
           Et autres intellectualles.

                       XXXVII

           Et mesmement l'estimative,
           Par quoy prospective nous vient,
           Similative, formative,
           Desquelles souvent il advient
           Que, par leur trouble, homme devient
           Fol et lunatique par mois :
           Je l'ay leu, se bien m'en souvient,
           En Aristote aucunes fois.

                         XXXVIII

           Dont le sensitif s'esvilla
           Et esvertua Fantaisie,
           Qui tous organes resveilla,
           Et tint la souveraine partie
           En suspens et comme amortie
           Par oppression d'oubliance
           Qui en moy s'estoit espartie
           Pour monstrer des sens l'aliance.

                         XXXIX
                                                                                                                 
          Puisque mon sens fut a repos
          Et l'entendement demeslé,
          Je cuidé finer mon propos ;
          Mais mon ancre trouvé gelé
          Et mon cierge trouvé soufflé ;
          De feu, je n'eusse peu finer ;
          Si m'endormis, tout emmouflé,
          Et ne peus autrement finer.

                          XL

          Fait au temps de ladite date
          Par le bien renommé Villon,
          Qui ne m'enjue figue ne date
          Sec et noir comme escouvillon,
          Il n'a tente ne pavillon
          Qu'il n'ait laissié a ses amis,
          Et n'a mais qu'ung peu de billon
          Qui sera tantost a fin mis.

                                                                                                                   
                  François Villon
François né Corbeuil dit Villon aussi François de Moncorbier dit Villon                           
                                                                          

Aucun commentaire:

Enregistrer un commentaire